مشيت ف شارع ألأمير في سنة خمسين

وكان الشارع حرير انواره تخذي العين

نضافة وجمال مثير وفنون علي الصفين

تاريخ وكان له عبير مسحه غراب البين 
سألت صالح عنان وقلت طلعت فين ؟
قال هناك ف البنك مصري لمصريين
وعبود ف الحوامدية والقزاز ل ياسين

أما الرمالي يا ناس فكان طحينه طحين
وطن وفوق الراس وفلوس لوطنيين
خلوا الفلوس تنداس لصالح الملايين
مش عبي ف البلاص وابعت علي برلين
والشفط والتهليب شعار لحزب أمين
وأمين دا شيخ منسر بالبصمة أو بالجين

ورجعت بعد سنين مليان بشوق وحنين

اتمشي ف الشارع القي اليفط مترين

يفطة ألأمير سابق والحالي ثوريين
ثوار علي المصري باعوا البلد لكوهين
مصنع ورا مصنع حتي الحقول والطين
حتي التاريخ أتباع وزوروه ف الصين
وغاز لجيل قادم ممنوع علي المساكين
ندعم ولاد جولدا ونعمل لغزة كمين
والنيل بقي بركة م الصرف والتعدين

تشرب يجي قزازة تهري ف المصارين

تجري لمستشفي تصعب علي الكافرين

نادر تلاقي الشاش او قرص يشفي انين 

حتي الطبيب أحتاج سماعة للودنين

ويخرجوك دوغري علي مدفن البساتين 

أدفن ولا يهمك الشيخ كأنه جنين

كأنه حمل حرام ينزلوه ف شهرين

ليه اللي يحكمنا ضواري م الملاعيين ؟ 
واحنا الفريسة ننام ع الطوي راضيين

لا مواء ولا خربشة ولا حفظ ماء خدين

حتي القطط كانت علينا م الساخطين
وأشوف علي بابا جوة المغارة تخين
والزلع حولة فيها اللصوص راقدين
والست مرجانة ع الشاشة عريانة بتوفر الفساتين

وف شرعها الهدمة تخبي منطقتين

خاللي الصبايا تهيص خاللي الولاد ساقطين

لا نقاب ولا غيره يكشف لنا الكفين

يكشف معاه الوجه والقهر جوة العين

واسمع يا حاميها ليه سيبتها لخاينين

خانوا الوطن والناس باعوا الشرف والدين

اخدوا الكنوز ببلاش بقروض ليوم الدين

واحنا اللي كان بيتنا كعبة للوافدين

اصبح يلابطنا في المهجر التعابين

راضخ يا عبد العال لابتزاز شعانين

وزاد عليك الابتزاز لما لقوك بتلين

بدأ اللي بيته قزاز يسب لينا الدين

حتي من التلفاز الشتم والتطجين

واحنا بصبر الابل علي اللئام صابرين

لو ينتهي صبرنا راح تنفجر براكين

ومشيت علي مهلي شارع الامير ساعتين

اسمعها تندهلي وتقول نبين زين

ارمي البياض ارميه ووشوش الدكرين

همست انا للودع بسأل ح نوصل فين ؟

قالت لي قوم يا جدع مليت بلدنا طنين

طنين ذكور النحل قبل الاجل م يحين

عزت عفيفي قطب

* الاسماء الواردة لرموز مصرية قبل الثورة